هذيان

السلام عليكم

كل سنة وكلنا طيبين بمناسبة السنه الهجرية والميلاديه وكمان عيد ميلاد صلاح جاهين كل سنه وهو طيب

وكمان كل سنه وكل الطلبة طيبين بمناسبة امتحانات الترم وطبعا لازم نحتفل بالامتحانات كويس ونعمل جدول تمام

ممكن نقول في الجدول ان اليوم 24 ساعه منهم 8ساعات نوم ومنهم حوالي 3ساعات اكل وفوقان من النوم ونيجي على نفسنا ونقول 4 ساعات انترنت ونقول ساعتين بس تليفزيون وساعتين نوم كمان علشان نعرف نركز كويس اه نسيت حاجه مهمه ان المفروض لسه فيه كليه يعني حوالي 7 ساعات

كده نتيجه اليوم

8+3+4+2+2+7=24

كده انا بيس على راي بيبو

وعايزه اقول للبلوج ده على سر رهيب

انا حاسة اني هسقط السنة ديه

ابسط حاجه اي حد هيقولهالي وانا بقلها لنفسي حاسة انك هتسقطي زاكري

فهرد على اي حد وعلى نفسي واقول ما انا هزاكر ان شاء الله بس برضه هسقط ههههههههههه بجد احساس متملكني جدآ

يلا ربنا يعديها على خير

عايزه اقول للبلوج سر تاني

مش عايزه اتكلم مش قادره اتكلم حتى مع نفسي

وياريت ان الناس تفهم ان اللي محتاج مني حاجه ميقوليش عليها لا يكتب الطلب ويبعته وانا هبعهتله الرد مكتوب

ناقص حتة

في هذا الصباح غادرت قطعة من قلبي حدود البلد

ارجو من الله ان يحفظها لي في اي مكان ذهبت اليه الي ان تعود الى قلبي مرة اخرى

احساس غير متوقع

مكسوره وقلبي واجعني

3

4

5

من غير عنوان

أبكى لو في عيني دموع

للعلم ده مجرد حلم

السلام عليكم

نفسي : كل سنه وانتي طيبه يا بوتا الدراسه بدأت يارب تكون سنه حلوه عليكي

انا : وانتي طيبه يا نفسي ومتشكره على الدعوة يارب تكون سنه حلوه عليكي انتي كمان

نفسي : هاه يا بوتا ناويه على ايه

انا : ناويه على كل خير ان شاء الله

نفسي : مش ناوية تتغيري

انا : لا مش ناويه هعهعهعهعهعهعهع وبعدين انتي مالك يا رخمه

نفسي : صحيح وانا مالي طيب على الاقل مش ناويه تظبطي نومك

انا : نومي تصدقي عندك حق صحيح يا نفسي نفوستي حلمت حتة حلم امبارح ربنا يجعله من حدك ونصيبك

نفسي : ايه هو

انا : خير اللهم اجعله خير انا كان فيه طفله نايمه مامتها جت صحتها الصبح علشان تروح المدرسه

البنت قالتلها سيبيني خمس دقايقه يا ماما

مامتها سابتها ورجعتلها تاني صحتها

البنت قامت صممت انها متغسلش وشها لغايه ما مامتها تلبسها هدوم المدرسه علشان لو غسلت وشها هتفوق وهي عايزه تكمل نومها وهي بتلبس

البنوته لبست هدومها وغسلت فعلا وشها وبعدها مامتها عملتلها قطتين ونزلت لها القصه الفرانشه

نفسي : بجد فرانشه وااااااااااااااااااو

انا : ممكن متقطعنيش اسكتي خالص خليني اكمل

المهم البنت نزلت المدرسه وملقتش اي حاجه حلوه في المدرسه غير حصص الرياضه لانها كانت بتحبها اوي وكان اهم حاجه عندها انها تحل المسأله اول واحده في الفصل وتروح تديها للمدرس يعلمها ويقلها صح

البنت رجعت من المدرسه نامت اكلت شربت

قامت بقى علشان تعمل الواجب

نفسي : ايه ده ديه شكلها دحيحه نياهاهاهاها

انا : ممكن تسكتي يا ظريفه بقلك تعمل الواجب مش تزاكر فيه فرق

سيبيني بقى اكمل ممكن

وهي قاعده بتزاكر كانت بتبص من الشباك كل شويه

لقيت اخوها الكبير جري

نزلت على السلم جري وهي حافيه

قام هو خدها في حضنه وباسها

تصدقي كان حضنه دافي اوي

نفسي : يا صباح الاستهبال وانتي فاكره الحضن من الفيلم ههههههههه قصدي الحلم

انا : اها فاكراه اوي اوي اوي ومش قادره انساه وكمان هي فضلت متعلقه بيه لغايه ما دخل الشقه وهي ملازماه زي ضله مش عايزه تسيبه

هي كانت بتحبه علشان حنين وعلى طول كانت بتاخد منه اقلام يوني بول فسفوري وازرق واقلام رصاص روترنج

نفسي : واااااااااااو ياريت كان ليا اخ يديني اقلام من ديه انا اخواتي بيدوني بالقلم بس

كفايه تهريج بقى

انا : على فكره هي عندها اخوات تاني كلهم اكبر منها وهي بتحبهم كلهم وهما كمان بيحبوها

المهم مامتها كانت خارجه وطبعآ هي مش بتسيب مامتها ابدآ ما هي اخر العنقود سكر معقود وهي من كتر ما سكرت لزقت في مامتها وكان على عينها تسيب اخوها الكبير نايم بس هو كان نايم

نفسي : حلوه موضوع سكرت والله وبقينا بنهزر

انا : ايوه ياختي بهزر من الغلب استني بقى اكملك

ونزلت راحت عند ناس وهي من زمان مبتحبش الناس والزحمه وخصوصا انهم كانو بيخنوقوها وكفايه انهم بيبقى عايزين يقعدوها على كرسي لوحدها مش على رجل مامتها بس هي ابدا مكنتش توافق كان اخر احتمال ليها انها تقعد جنب مامتها لزق كده

ليه بقى ماهي بنوتتنا لئيمه من صغرها علشان لما تزهق تفضل تشد في مامتها وتدوس على ايدها معناها

قومي بينا نمشي قومي بينا نمشي قومي بينا نمشي

وهي شهادة لله كانت زنانه من صغرها

المهم رجعت فعلا البيت

لقيت اخوها الكبير صحي ولبس وخلاص هينزل

طبعا اكيد حفظتي فضلت لازقه فيه لغايه ما نزل

مش سابته غير على باب الشقه وهي بتسلم عليه وبتبوسه وبتقله هتيجي امتى وهو يقولها مش هأخر وهو نزل فضلت واقفه على السلم تطمن عليه

وبعدين جري على الشباك تشوفه وهو ماشي في الشارع

نفسي : شحتفتي قلبي

انا : ياريت تحسي يا نفسي

ياريت

وطبعآ مش لازم اقلك انها بعدها دخلت نامت

وخلص اليوم

نفسي : اخييييييييييييييييييييرآ

انا : تصدقي يا نفسي كان نفسي اكون البنت ديه لو ليوم واحد

نفسي : نعم نعم ما انتي هي فعلآ

ده مش حلم يا بوتا دي ذكرى

وكل اللي انتي فيه ده اشتياقك للحاجه ديه مش اكتر

معلش يا بوتا مش انتي اللي من زمان بتقولي كل سن وليه جماله

انا : بس انا نفسي ولو اعيش يوم واحد بس زي زمان

نفسي : ايه يا بوتا معلش يا حبيبتي لسه فيه ايام كتير احلى واحلي

انا : شكرآ نفسي

على ذكرى ساعات فحياتنا زمان

عايشين نتنمى يوم من العمر اللي فات

ونعيش مع ناس كانو اغلى الناس وياريت لو ترجع بينا اجمل ذكريات

لحظه ضعف

وحشتني اوي يا احمد

كان نفسي تكون معانا النهارده

بالنسبه ليا اليوم صعب

بس ربنا يجمعنا كلنا على خير

بس كفايه اني متأكده ان رغم سفرك انك فرحان

بجد وحشتني

ضحك وبكا

السلام عليكم

برضه واضح اني مصممه ان البلوج ده مكتوب عليه الشقاء والعناء سيبكم من المقدمه اللي ملهاش لازم واحب اقلكم

على اخبار تفرح

كتب كتاب اخويا لولولولولي

انا نجحت وكمان نجحت صافي الترم ده هههههههههه يعني معايا بس ماده الترم الاول

انا نجحت في الاليات وجبت فيها 125 من 200 يعني دي من عجايب الدنيا ال20

انا جبت في ماده زاكرتها كويس وكنت فهماها ج ج يعني جيد جدآ يعني انا مش غبيه الحمد لله

انا اكتشفت يوم نتيجتي ديه ان فيه ناس كتير بيحبوني واقدر اعتمد عليهم وكنت حاسه الفرحه بصوتهم وانا كل سنه بنجح بدعا الوالدين لكن السنه ديه متأكده اني نجحت بدعا الوالدين وكمان دعا اصحابي

بس كفايه كده فرحه لاحسن من كتر الفرحه يحصلي حاجه

---------------------------------------------------------------------------------------------------------------------------------

اخبار مش تفرح خالص

ان احمد اخويا مش هيحضر كتب كتاب محمود اخويا اللي هو يقربله قرابه بسيطه اوي يدوبك اخوه بس ملعونه الغربه وللاسف انا مش بفرح غير لما احس ان كل اخواتي جنبي وجنب بعض وبحاول اتعالج بس مش عارفه

مش فرحانه اني نجحت ههههههههههههه لالالا انا مش عبيطه مش متعوده افرح ومش كل الناس اللي حواليا فرحانين وخصوصا لو الناس ديه ساعدتني كتير وتبص تلاقي نفسك انت نجحت وهما سقطو طبعا ده نصيب بس فعلا ضيعو فرحة النجاح خالص بس ربنا يكرمهم ان شاء الله

كل ما ابدأ اتغير واحاول اكون احسن حد يجي يقولي عيب فيا او حاجه المفروض تتغير ابص الاقيني عايزه اخنقني واخنق الحد ده لانه مش وقته اصلا

اكتشفت اني متناقضه وده اللي الناس حسستني بيه انا عند ناس طيبه اوي وعند ناس مش طيبه خالص والاتنين بعاملهم بنفس الطريقه ونقيس على الطيبه حاجات كتير

اكتشفت محتاجه معامله خاصه جدآ ومش اي حد يعرف يتعامل معايا ويقنعني بوجهه نظره

كفاية كآبه بقى علشان معيطش

-----------------------------------------------------------------------------------------------------------------------------------

طلب من اي حديدخل هنا

بجد يا جماعه ادعولي جامد فيه موضوع نفسي يتحقق ادعولي ربنا يعملي الصالح ويكرمني بيه لاني فعلا محتاجه للموضوع ده جدآ

new look

3

2

1

0

هههههههههههههههه معرفش انا ايه اللي عملته ده

وانا هتجنن عليه template بس الصراحه من ساعه ما شفت ال

ولو مكنتش حطيته كان هيحصلي حاجه

طبعا بغض النظر عن الكآبه اللي انا بكتبها في البلوج اللي مش لايقه عليه بس

عاجبني جدآ يكفي اني كل ما اشوفه بقعد اضحكtemplateال

بغض النظر كمان على اني دلوقتي من غير بروفايل

بغض النظر على ان البلوج كله عايز يتظبط كويس وطبعا معرفش ده هيحصل امتى بس لازم يكون عندي امل وعمرو وفاطمه بالمرة

بغض النظر على اني عند حفظ كتير جدآ وسيادتي سهرانه رغم ان عندي تسميع بكرة

بغض النظر ان انا اللي بعمله ده غلط جدآ

بغض النظر ان النهارده اول يوم اضحك واتبسط تقريبا من كتير

بغض النظر عن حاجات كتير اوي

واهم بغض النظر ان الحاجات اللي انا كاتباها ديه كلها ملهاش علاقه ببعض وان ده من تاثير شكل البلوج الجديد

اقلكم على سر انا مكنتش بحب اللون الابيض في بمبى ده بس كان لازم اغير الاسود وكنت شايفه ان الابيض والبمبى ده احسن الوحشين

هههههههههههههههههههههههه

افتكرت في حاجه سوده تحت كده فيها علامة بلاي هتجنن واعرف ديه بتاعت ايه لو حد عرف يبقى يقولي معلش اختكم جاهله جدآ

اه اي حد يدخل لازم يقول رأيه شكل المدونه عجبه مبدئيا ولا ارجع الاسود

يلا بقى كفايه عليا كده

اتمنى لنفسي احلام سعيده

ايه الفرق؟؟ طيب ليه الفرق !!!!! طيب صح طيب غلط

طبعا عنوان غريب

بس عايزه اعرف ايه الفرق بين البنت والولد اكيد ان البنت بنت والولد ولد

وان البنت شكلها بنت وان الولد شكله ولد

لكن انا مش بسال على كده

ايه الفرق بين اني اعرف بنت او ولد

وليه فيه فرق

انا واحده من الناس عندي مشكله لما بتعرف على حد مبيفرقش معايا بنت او ولد بس المهم الدماغ ايه الروح ايه

وفي الاخر بتصدم ان حد يقولي لا ده ولد

هو انا لازم اي ولد اعرفه احبه او لازم هو يحبني مفيش غير كده احنا مبنفكرش غير في كده

معرفش انا صح او غلط بس فيه حاجات بتبقى جوا الواحد صعب انه يغيرها

ولو غيرها هيغير معاها حاجات كتير ده حتى ممكن يغير اسمه بالمرة

!!!!!!!!!!!!!!!!!!!!!!!!!!!!!!!!!!!!!

تاج فاطمة

السلام عليكم

يا ناااااااااس ياهو التاج ده علشان خاطر عيون فاطمه صحيح انا كان المفروض اعمله من كتير بس ظروف النت والامتحانات واني مش بعرف اجاوب على اسئله كل الحاجات دي خلتني ااجلهم وانا عملت واحد وفاضل واحد او اتنين بس في السكه ان شاء الله

لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

ماما
أختى
اي راجل او ست كبيره يكون الطيبه باينه في عينهم

لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟

عايزه اعرف مين انا انا الحد الكويس ولا والوحش اكيد انا الاتنين بس لازم في كفه تزيد
عايزه اقرب اكتر من ربنا وربنا يقويني على ده ان شاء الله
عايزه ربنا يكرمني وانجح السنه دي

ما هو هدفك فى الحياة ؟؟

الحمد لله دلوقتي الرؤيه مشوشه جدآ عندي فمش قادره احدد
نقدر نقول ان هدفي حاليا ان اعرف انا عايزه ايه وبعد كده احدد الاهداف والاوليات

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

هو من باب تفائلو بالخير تجدوه يبقى مقتنعه بيها
لكن الحقيقه ان على حسب اليوم ممكن يوم اشوف ان بكره احسن ووممكن يوم اشوف ان بكره ضلمه

أجمل مقولة سمعتيها فى حياتك ؟؟

لا تشك للناس هما انت صاحبه لا يؤلم الجرح الا من به الم
اذا كان الكلام من فضه فالسكوت من دهب

من المغنى اللى بتحبه أوى و إيه أحلى أغنية ليه بتحبها ؟؟

منير
والاغاني اللي بحبها حدوته مصريه وخايف وعروسه النيل ويونس

غزة" تمثل لك إيه فى حياتك ؟؟"

اشتياق
(دي مدونه لفلسطينيه بحس انها هي غزه بالنسبه ليا )

أعطى لإنتمائك لوطنك درجة من مائة ؟؟

!!!! وطني
وطني حبيبي.. الوطن الاكبر.. يوم ورا يوم امجاده بتكبر، وانتصاراته ماليه حياته.. وطني بيكبر وبيتحرر.. وطني.. وطني

لو تزوجتى و أنجبتى بنتين و ولدين أى الأسماء تختار لهم ؟؟

ان شاء الله نفسي ربنا يكرمني بيحي لكن مفيش اسماء تاني في دماغي ولا بنات ولا ولاد

عمرك غشيت فى أمتحان و انت صغير ؟؟

ده انا لسه من كام يوم في امتحان الاليات الخزعباليه الاول كنت بغشش وبعد كده غشيت وياريته فرق تقريبا معلومات اللجنه كلها متحلش الامتحان اساسا اصلها كانت لجنه تخلفات

لكن انا في لجنتي الاساسيه قاعده في الاول قدام الحيطه فمش بشوف حد ولا حد بيشوفني وكده احسن بحس اني في صومعه

لو أتعرض عليك رشوة كبيرة و انت فى زنقة ماليه هتعمل إيه ؟؟

الله الغني عن الحرام ربنا هو اللي بيزرق ويمكن ده اختبار ليا

قول 3 صفات ب 3 كلمات بس توصف بيهم شخصيتك (يعني كريم طيب خدوم كده )0

بارده
عصبيه
طيبه

اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه

مش عارفه هجيب لكل واحد ايه بس الفكره اني لازم اجيب وان اول مرتب ده يبقى مش بتاعي هجيب حاجات للناس اللي بحبها واطلع اللي ربنا يقدرني عليه

برضه بكلمة واحدة ايه اهم صفة عايزها في شريك حياتك

رجل والرجال قليل

ايه المجال اللى غير دراستك وشايف نفسك فيه قوي حتى لو كان ياشيخ الرسم عالحيطة

عماره
او حاسبات

بتحب السفر

بحب السفر للفسحه او الدراسه يعني السفر المحدد
لكن مبحبش السفر التاني الطويل ده

طب دلوقتى حالا ايه المكان اللى نفسك تكون فيه

عند احمد اخويا

تمرر التاج ده لمين ؟؟

دكتور كاسبر
نور مفيش فايده
يوكي وبونجو
الاتربي اللولبي
ابو صلاح مدونه تنفيس

يارب

يارب

اللهم اني لا اسالك رد القضاء ولكني اسالك اللطف فيه

بوتا المفترسه

انا : زعلانه منك اوي يا بوتا

انا : زعلانه منك اوي يا نفسي

ومش زعلانه من حد تاني في الدنيا غير الاتنين دول لانهم بقو بياذوني جدآ

انتي مجنونه في حد نفسه بتأذيه

انتي مجنونه في حد هو بيأذي نفسه

حتى لو ده مش حاصل بس كفايه اني حاسه اني بقيت خطر على نفسي ونفسي خطرعليا وعلى البشر

موسم الغباء العالمي

السلام عليكم

انقطاع النت عني بمثابه تجربة قاسيه عليا جدآ صحيح انا اتعودت بس برضه

يلا يارب يجي بسرعه بس بعد الامتحانات علشان مش ناقصه ضياع اصلها

الامتحانات : كلمه غبيه لا ديه هي الغباء نفسه

هو احنا ليه بنمتحن اكيد السبب الاساسي انهم يعذبونا ويربونا ويورونا اللي عمرنا ماشفناه

انا زيي زي كل الناس بمتحن وزيي زي كل الناس بتطلع نتيجتي وساعات بنجح وساعات بسقط

وبرضه زيي زي كل الناس المواد اللي بنجح فيها زيها زي اللي المواد اللي بسقط فيها متساوين يعني المساواه في عدم الفهم عدل

ام هند وابو هند وجوز هند واخوات هند وآل هند كلهم ويخرب بيت هند

ان فاضل 10 ايام على موسم الغباء العالمي

وبجد بجد لو مستغلتش كل دقيقه في الايام ديه انا هعيد السنه

كده كده الموضوع ده نصيب هههههههههههههههههههههههه

عادي ان شاء الله خير

بس انا فرحانه اني اتكلمت وخلاص صحيح انا متاكده اني مجمعتش كلمتين على بعض بس كفايه اني اتكلمت

وكمان مبسوطه اوي اني مصعب الخير خطب رغم اني معرفوش بس فرحت علشانه كاني اعرفه

ربنا يوفقه هو وخطيبته

اي حد معدي من هنا يدعيلي ان ربنا يعملي الصالح

انا غيرت خلاص عنواني

السلام عليكم

كل سنه وانتي طيبه يا بوتا

كل سنه وانتي طيبه يا ماما

كل سنه وانت طيب يا بوه على الرغم اني مش عارفه عندك 7 سنين دلوقتي ولا 8 بس مش مشكله

ومبروووووووووووووووووووك يا بوتا على النتيجه شفتي حظك عيد ميلادك والنتيجه في يوم واحد

مش عارفه افرح ولا ازعل هي اكيد النتيجه حاجه متفرحش خالص بس انا مبسوطه اني طلعت بماده واحده بس مش اكتر لاني كنت شبه متأكده اني هشيلها بالاضافه اني مكنتش بزاكر علشان اطلع بتقدير يعني فكده فعلا يبقى فضل من ربنا الحمد لله

اللي حصل اني مكنتش متوقعة ابدا انها تطلع النهارده وفي الوقت ده لانها تقريبا الساعه تسعه كانت لسه مطلعتش وبعدين النت عندي فصل كالعادة لغايه ما جت الساعه 12 واصحابي كلموني يقولولي كل سنه وانتي طيبه وقعدت مع اخواتي شويه وقمت قلت افتح اشوف النت جيه ولا لا فتحته لقيته جيه والله فتحت صفحه النتيجه غصب عني علشان انا اخدت على كده اول حاجه بعملها اول ما اقعد على الجهاز وقلت عادي بقى اكيد لسه مطلعتش ببص لقيت علامه الصح منوره كنت هقفل تاني ههههههههههههههههههههه بس قلت اجمدي طن طن طن تش

وشفتها واتصدمت شويه وقعدت اضحك وبعدين صحيت اختي قلتلها توتا ممكن تقومي قامت مفزوعه قلتلها مفيش حاجه عادي وبعدين قلتلها النتيجه ظهرت برضه ازبهلت شويه وقلتلها معايا ماده واحده بس مكنتش عارفه هي فرحانه ولا زعلانه بس قلتلي كويس انتي مش كنتي بتزاكري اساسا قلتلها هطلع انشر الخبر قالتلي متخليها للصبح قلتلها لا لو حد صاحي هقله علشان اخلص

لقيت ماما قلتلها ماما نتيجتي ظهرت قالتلي هاه قلتلها معايا ماده قالتلي ماده واحده بس واستغربت حسيت انها كانت منتظره مني اكتر من كده يعني مادتين تلاته

وقعدت تقولي لما مش بتزاكري ومعاكي ماده واحده بس امال لو زاكرتي بس شويه قليلين هتعملي ايه قلتلها هسقط هههههههههههههههه

وقعدت طول ما انا واقفه اقول انا نتيجتي طلعت انا معايا واحده بس وهكذا دواليك

ولقيت واحده صاحبتي بعتالي رساله تقولي معلش وكلام من ده

انا محتاره اوي

كفايه ان النهارده عيد ميلادي ده كفيل انه يخليني احتار لاني انا مبحبش اكبر مش علشان السن والكلام ده بس بخاف من المسئوليه جدا واني كده بتتفرض عليا حاجات كتير

مش عارفه بقى بس انا رغيت كتير اوي

كنت ناويه اتكلم على الحاجات اللي بحبها النهارده لكن مره تانيه ان شاء الله

شبه اكتشئاب ايون بتتكب كده

السلام عليكم
البلوج وحشني اوي وكنت كاتبه حاجات كتير في الدرافت بس مسحتها معرفش ليه بس مش مشكله
اولا بجد كنت مبسوطه اوي ان في حد سال عليا في التدوينه اللي فاتت
بس انا كان النت عندي بيفصل كتير وكمان كنت خايفه ادخل عند ناس معينه معرفش ليه يمكن كنت خايفه الاقي مواضيع واقراها وعارفه اني مكنتش هرد برضه فقلت بلاش ادخل
اكتشفت اكتشاف رهيب اني سلبيه جدا
هو عادي ان الواحد ممكن يقول لحد انا عايز ابكي انا ساعات كتيربحس بده
وفعلا بكون عايزه ابكي جامد في حضن حد بس هو ميتكلمش يسبني اطلع كل اللي في نفسي مش ممكن ارتاح
ولا هو الناس شايفه ان البكا ده كآبه ونكد

فعلا انا النهارده بقول للبلوج ده انا عايزه اعيط دلوقتي حالا
صحيح مفيش دموع بس حاسه ان قلبي هو اللي بيبكي

يمكن خوف من النتيجه اللي تقريبا بكره

يمكن علشان عرفت ان والدة واحده صاحبتي تعبانه مش عارفه ليه خفت اوي وانا بكلمها مش عارفه ليه كانت صعبانه عليا اوي كده مش عارفه ليه بعد ما قفلت حاولت اني اطلع كل اللي جوايا بدموع ومقدرتش مش عارفه كنت حاسه اني مش خايفه على والده صاحبتي بس لا انا خايفه على ناس كتير اوي

يمكن علشان جبت نتيجه حد عزيز عليه ولقتني خايفه عليه لا تطلع معاه ماده كمان وانا اعتقد ان حاجه زي ديه هتتعبه نفسيا وممكن شبه تدمره

يمكن علشان اتعرفت على بنت النهارده وقعدت تشكر فيا كتير وتقولي انا طيبه وانا حاسه اني مش كده والمشكله اني متاكده ان البنت ديه بتتكلم جد يعني مش بتنافقني

يمكن علشان حاسه اني مقصره مع نورا ودينا وسمر ونهى ومنه ونهله وهدى وماريان ومنى ونهاد ونهاد ونهاد ونهاد ونهاد ونهاد ونهاد ونهاد ونهاد ونهاد ههههههههههههههههههههه والاهل والاقارب في منيا القمح

يمكن علشان عندي كميه ريبورتات مهوله عايزه تتعمل وانا منفضالها

يمكن علشان بقالي يومين بروح الكليه

يمكن علشان في ناس معينه وحشاني

يمكن علشان مقصره في حق نفسي جدا وانا متاكده ان محدش هيفهم موضوع تقصيري معايا غير نفسي بس انا عارفه
ان نفسي بتسعتبط

يمكن علشان مفيش سبب مثلآ

بس حاجه اخيره هو لازم الوحد يكون عايز يبكي يكون عنده سبب مش ممكن من نفسه كده

يلا الحمد لله وربنا يستر هي الكليه منها لله اللي بتعمل فيا كده

معرفش ليه التنسيق مش راضي يتظبط والكلام طالع تحت بعضه بالصوره الغريبه ديه

انا مين

انا بوتا اه بوتا وبحب الاسم ده جدا جدا رغم انه غريب بس كفايه اني بحبه وانا للاسف لما بحب حاجه بخلصلها اوي لدرجه انها ممكن تضرني ههههههههههههههههه

غريبه انتي يا بوتا بس ده من زمان جايه لسه تكتشفي ده دلوقتي بس عادي بقى عادي

هابي درازه

اهيء اهئ اهئ اهئ ال هابي درازه ال ناس فاضيه

مش متخيله نفسي هصحى كل يوم الصبح بدري وانزل الكليه واروح واحضر وووووووو لالالالالالالالالالالالالا ده كده كتير انا تعبت بس من مجرد التخيل امال الواقع هيبقى ايه

هو كده الواقع دايما مرير هههههههههههه ال مرير ال

بت انتي هشتمك هبهدلك هعمل فيكي ما لا يعمل انا بحنذرك خدي بالك ممكن اخنقق وانتي نايمه طبعا الكلام ده لنفسي علشان تخاف مني ههههههههههههه شريره من يومي

انا خايفه وبردانه دايما لما ببقى بردانه ببقى خايفه او لما بخاف ببرد يعني اتنين في واحد شامبو وبلسم

وكمان عندي اوفر يجنن عليهم عدم ثقه بالنفس شديده وكمان ايه عدم تركيز بشع

ههههههههههههههههههه يعني انا دلوقتي بكتب كده اي حاجه تيجي على بالي

اه مبروك لمصر ولاهل مصر

واحنا فعلا طلعنا شعب زي النعام بنحط راسنا في الرمله ومبنطلعش غير في الافراح لكن وقت الازمات دافنين راسنا في الرمل

وطبعا وقتنا كله بقى ازمات

------------------------------------------------

على فكره انا طفله جدا لا مش طفله عيله وكمان عيله مجنونه

رغم اني مش عارفه الفرق بس عادي بقى

اتخنقت من عادي ومفيش ومش عارفه ومش فارقه ومشتقاتهم

ربنا يهديني ويهدي الجميع

********************************

تحديث بعد خمس دقايق تقريبا

Where you are! you will have Problem $ INDUSTRIAL ENGINEERS solve each Problem

ههههههههههههههههههههههههههههههههههههههه بجد قاعده اضحك من ساعة ما قريتها وكل ما دور الاقي ان مجال الدراسه حلو جدا بس معرفش ايه سبب العداوه اللي بينا

استني يا بوتا في جمله كمان تضحك

Engineers can make things, But Industrial Engineer can makes things better

وده طبعا مش منظره علشان الشعبه لكن لاننا فعلا بندرس حاجات تخلي طريقه تفكيرك مميزه ويبقى عندك حل لاي مشكله في الدنيا ويكون حل مميز برضه زي طريقه تفكيرك بس كل ده المفروض وياريت يحصل بس للاسف عادي بقى

فاصل من الضحك والكركره بس بدون شيشه

انا شكلي اتجننت

السلام عليكم
ياااااااااااااااااه بقالي كتير جدا مجتش هنا
يمكن علشان مكنتش فاضيه علشان احمد نزل اجازته
يمكن يكون علشان النت عندي فصل شويه
يمكن يكون علشان الامتحانات (ههههههههههههههه)
كذا يمكن بس اهم يمكن فيهم اني يمكن اكون خايفه ده اكيد خايفه
ولا علشان شكلي بحب جديد
حتى دي مش عارفاها خايفه جدا من نفسي خايفه جدا من افكاري المجنونه
تخيلو لما الواحد يكون مش عارفه هو بيحب ولالا وقت يحس انه ميقدرش يستغنى عن الشخص ده ووقت يحس ان وجوده حاجه عاديه
عادي بقى عادي بقى
المهم امتحاناتي بعد اسبوع بالظبط زي النهارده يعني سبع ايام وتمن ليالي يعني حوال 164 ساعه
وقولي في يوم مراجعه كمان ضاع
وهتبدا المعركه وتقريبا عارفه اني خسرانه
رغم ان اسبوع ده كتير جدا ويكفي اني ازاكر كويس بس لو زاكرنه بضمير وانا تقريبا ضميري في اعاره ربنا يجيبهولي بالسلامه

لازم اخد شويه قرارات

1- مفيش كمبيوتر الحمد لله هو متدمر اساسا

2- في مزاكره كل يوم وفيه تشجيع مني لنفسي

3- اني اقسم وقتي هما خمس مواد ماده منهم مش بتتزاكر ودي حصه المراجعه وخلاص يبقى اربع مواد ماده انتاج والكترونيكس واحصا وديزين هههههههههههههههههههههههه
سيبك من الاحصا والالكترونيكس هيخلصوا في المراجعات تمام
يتبقى الانتاج والديزين هما دول المشكله بس انتي عارفه انك تقدري بس محتاجه تشجيع وانك يكون عندك دم وتبطلي تضيع وقت
لو كل يوم قسمتي الانتاج واخدتي كام فصل وخدتي معاهم حل بروجكت ديزين او شيت سيبك من الشيتات زمانها عدى خلاص هو بروجكت واحد في الاول هتتعبي بعدين هتلاقيه بسيط
ومفيش مانع تاخدي كام حصه الكترونيكس مش هتفرق
حلو الكلام اوي تفتكري هتقدر تنفذي اعتقد لالالالالالالالالالالالالالا



4- احمدك يارب اني قدرت اكتب اي حاجه ف الدنيا مش عارفه ليه الموضوع قالب معايا برهبه وخوف وهبل

5- الجهاز اللي انا قاعده عليه ده غريب اوي معرفش ليه مع اني بحس في السايبر هنا انه جزء من الكليه عادي يعني بس شكل المشكله في الجهاز عادي

7- يلا بقى فتحي مخك عندك مراجعه احصاء باينك بجد غبيه في حد بياخد مراجعه في الاحصا يلا بالشفا كله بيروح في الغسيل

سلام وبعد كل امتحان هاجي اكتب انا عملت ايه بس هطلعه في اخر امتحان ربنا يوفقني ويوفق كل اللي بيمتحنوا