Wednesday, March 12, 2008

شبه اكتشئاب ايون بتتكب كده

السلام عليكم
البلوج وحشني اوي وكنت كاتبه حاجات كتير في الدرافت بس مسحتها معرفش ليه بس مش مشكله
اولا بجد كنت مبسوطه اوي ان في حد سال عليا في التدوينه اللي فاتت
بس انا كان النت عندي بيفصل كتير وكمان كنت خايفه ادخل عند ناس معينه معرفش ليه يمكن كنت خايفه الاقي مواضيع واقراها وعارفه اني مكنتش هرد برضه فقلت بلاش ادخل
اكتشفت اكتشاف رهيب اني سلبيه جدا
هو عادي ان الواحد ممكن يقول لحد انا عايز ابكي انا ساعات كتيربحس بده
وفعلا بكون عايزه ابكي جامد في حضن حد بس هو ميتكلمش يسبني اطلع كل اللي في نفسي مش ممكن ارتاح
ولا هو الناس شايفه ان البكا ده كآبه ونكد
فعلا انا النهارده بقول للبلوج ده انا عايزه اعيط دلوقتي حالا
صحيح مفيش دموع بس حاسه ان قلبي هو اللي بيبكي
يمكن خوف من النتيجه اللي تقريبا بكره
يمكن علشان عرفت ان والدة واحده صاحبتي تعبانه مش عارفه ليه خفت اوي وانا بكلمها مش عارفه ليه كانت صعبانه عليا اوي كده مش عارفه ليه بعد ما قفلت حاولت اني اطلع كل اللي جوايا بدموع ومقدرتش مش عارفه كنت حاسه اني مش خايفه على والده صاحبتي بس لا انا خايفه على ناس كتير اوي
يمكن علشان جبت نتيجه حد عزيز عليه ولقتني خايفه عليه لا تطلع معاه ماده كمان وانا اعتقد ان حاجه زي ديه هتتعبه نفسيا وممكن شبه تدمره
يمكن علشان اتعرفت على بنت النهارده وقعدت تشكر فيا كتير وتقولي انا طيبه وانا حاسه اني مش كده والمشكله اني متاكده ان البنت ديه بتتكلم جد يعني مش بتنافقني
يمكن علشان حاسه اني مقصره مع نورا ودينا وسمر ونهى ومنه ونهله وهدى وماريان ومنى ونهاد ونهاد ونهاد ونهاد ونهاد ونهاد ونهاد ونهاد ونهاد ونهاد ههههههههههههههههههههه والاهل والاقارب في منيا القمح
يمكن علشان عندي كميه ريبورتات مهوله عايزه تتعمل وانا منفضالها
يمكن علشان بقالي يومين بروح الكليه
يمكن علشان في ناس معينه وحشاني
يمكن علشان مقصره في حق نفسي جدا وانا متاكده ان محدش هيفهم موضوع تقصيري معايا غير نفسي بس انا عارفه
ان نفسي بتسعتبط
يمكن علشان مفيش سبب مثلآ
بس حاجه اخيره هو لازم الوحد يكون عايز يبكي يكون عنده سبب مش ممكن من نفسه كده
يلا الحمد لله وربنا يستر هي الكليه منها لله اللي بتعمل فيا كده
معرفش ليه التنسيق مش راضي يتظبط والكلام طالع تحت بعضه بالصوره الغريبه ديه

5 comments:

wa7!da said...

أووووووووووووول كومنت

ايه الغيبة الطويلة دى يا وحشة
طيب ادخلى قولى النت فصل ياجماعة وماتستنونيش على الغدا كنا هنجيبلك دليفرى

ياحمبى غيرى اللون وهترتاحى
نصيحة من واحده مجربة
غيريه بس الله يخليكى

وبلاش اكتئاب
بصى للحياة وشوفى أحلى مافيها
سيبك من الريبورتات والحاجات الغم دى
وعيشى كل ايامك على انها احلى ايام
وانها اخر ايام فى عمرك
تحبى اخر ايام حياتك بعد الشر تكون وحشه وفيها اكتشئاب

على فكرة عادى جدا انك تحسى انك عاوزه تعيطى من غير سبب
انا كده بردو
عيطى وخرجى اللى جواكى هترتاحى وتنزلى من الحمول اللى انتى شيلاها

ويارب تفضلى تكتبى وماتغبيش كده ربنا يخليكى

انا مبسوطة قوى انى كنت أول كومنت
سلام يا بوتتى

أمير الهدوء said...

سهل ان الواحد يبكي
بس الواحد يبكي

مود الاكتئاب حله
إنك تقربي من ربنا اوي

:)

bota said...

wa7!da


اهلا اهلا
جايه بنفسك وكمان جايبه دليفري طيب كان نفسي في حاجه من ايدك يلا المرة الجاية ان شاء الله

وباذن الله هغير اللون قريب بس تدفعي كام هههههههههههههههه لازم نستغل الشعب

اما بالنسبه للريبورتات ربنا يكون في عونا وياخد الماده الغبيه اللي الدكتور بيطلب كل محاضره ريبورت فاكرنا فاضين مش ورايا حاجات اهم اوعي تساليني ايه هي الحاجات الاهم هقلك معرفش بس اكيد فيه حاجات اهم وخلاص

والله بعيط وتصدقي بطلت او هبطل اقول لحد انا عايزه كده اكتشفت ان نفسي احن عليا والله لما بحتاجلها

اما الكتابه فانا باذن الله هكتب بس ربنا معاكم انتو اللي بتقروا ربنا يعينكم عليا :)

وعلى فكره انا بحب بوتتي دي اوي

بجد ردك ده فرحني جدا جدا

bota said...

أمير الهدوء

عندك حق بس الواحد يبكي
ومتشكره على النصيحه وفعلا كل مشاكلنا حلها ان احنا نقرب من ربنا اكتر

سفروتة said...

السلام عليكم

ازيك يا بوتا عاملة ايه؟

بصي اولا اللي انتي فيه ده مش اكتئاب ولا شبه اكتئاب بلاش التصنيف ده لان والله الاكتئاب ده مرض خطير جداااااا

واي حد بيبقي مضايق يفضل يقول علي نفسه انا مكتئب وانا مش عارف ايه وهو مش عارف حقيقة الكلمة دي

المهم اللي انتي فيه ده ممكن نسميه حزن -شجن-توهان او انك ملخبطة اوي من جوا وافكارك مش مترتبة ،وناس كتير جدااا بيمروا بالحالة دي وانا كنت واحدة منهم بس خرجت منها والحمد لله

ياريت متخليش نفسك تحس كتيير انها زعلانةاو مضايقة لانك كده عمرك ما هتخرجي من اللي انتي فيه

حبي الحياة وحبي الناس،واقعدي مع نفسك قعدة معتبرة كده وشوفي انتي بقالك قد ايه متكلمتيش معاها واعرفي هي عايزة ايه بالظبط من بوتا واسعي انك تحققيه

ومتخليش افكارك تتشوش باي شئ ملوش لازمة في حياتك او مش هيفيدك

وزي ما قال امير حاولي تقربي من ربنا اكتر

معلهش طولت عليكي يا جميل

وان شاء الله تبقي احسن

سلام

:)