Tuesday, October 23, 2007

يا مستبده



طبعا يا بوتا اكيد انتي عارفه انتي جيتي هنا ليه اكيد علشان تعيطي ما انتي مش بتفتكري تيجي غير لما تكوني مضايقه

رغم انك اليوم كله قاعده بتقري في المدونات كلها بس مش بتعلقي شكلك يا بوتا سلبيه موت

صح ولا انا بفتري عليكي

لا مش بفتري انا متاكده

وبعدين كمان حرام عليكي هو كله ضرب ضرب مفيش شتيمه

بس تصدقي انتي عملتي النهارده حاجه مختلفه

مسكت ورقه وقلم وكتبت اللي حصل في اليوم صحيح كان نص يوم وكتبتهم في 3 صفحات فلوسكاب ومش سايبه سطر هههههههههههه امال لو كملت بقى

بس واضح ان المشكله تنحصر في الكليه اللي بقيتي بتكرهيها انتي يا بوتا اللي عمرك ما كرهتي حد جيتي على اخر الزمن وتكرهي الكليه

انا رغم اني شايفه المزاكره حاجه سهله بس مش قادره ازاكر مش قادره انزل واحضر وانتظم

علاقتك مع كل الناس بقيت غريبه

ماثره مع ناس صحابك كتير

يا بنتي دي عيد ميلاد منه كان النهارده ومفكرتيش تبعتلها حتى رساله رغم انك كنتي ممكن تكلميها بس النفس بقى

كنتي لمفروض تكلمي نورا تسالي عليها وتقليلها على حصل وتقليلها انها تيجي تمتحن الورش محدش ضامن الظروف وبرضه متكلمتيش

المفروض تتصلي بسمر اللي بقالك 25 يوم ما تعرفيش عنها حاجه

المفروض كنتي تتصلي بدينا تطمني عملت ايه في الامتحان او على الاقل تروحيلها ده انتو في نفس الكليه يا مفتريه

كل الناس دول بيحبوكي جدا ومايستهلوش منك كده كلهم لو عرفو بس عنك اي حاجه بتقليهم بيسالو

والله خايفه تكوني خايف على الكارت لا يخلص :) (بس انا مصدقش عنك كده ابدا)

اعمل فيكي ايه يا بوتا تعبت معاكي اوي اوي

ابسط حاجه المفروض تشحني موبايلك علشان كده هيفصل شحن ومش هيصحيكي

والغريب ان الموبايل جنبي والشاحن جنبي بس عايز حد يحطه في الفيشه ههههههههههههههههههههههه هو هيتحط لوحده دلوقتي

ده غير انك المفروض تنامي عندك بكره عتريس الصبح

طن طن طن دي اول مره هاحضرله وانا مالي مواعيده مكنتش منسباني اعمله ايه يعني

ويلا اهي الماده ممتده نعك في الميد ترم وبعين نبقى نظبطها

هتظبطي ايه ولا ايه ده انتي عنك بلاوي

يلا يا بنت انتي ادخلي نامي تصبحي على خير

وانتي من اهل الخير

21 comments:

admelmasry said...

مممم
شكلك في هندسة يا جميل ؟
.
.
.
وبخمن انك حلوان
بسبب حكاية الورش
.
.
.
بس مش عارفك مطرية ام حلوان ؟
.
.
ع العموم
كلها في بيتها
ختي لو مش حلوان فاهلا بك وسهلا في نادي المكتئبين المهندسين البلوجرية
.
.
.
الحالة اللي انتي فيها دي حالة عامة
ياعني ما تخافيش
هاتعيشي
.
.
كل اللي عليكي انك تاخدي حبايتين تفائل قبل الاكل مرتين يوميا
.
.
تحياتي والسلام

bota said...

بجد ردك فرحني جدا يا ادم

وانا فعلا حلوان الورش فضحتنا خلاص

ولو جيت هنا تاني ياريت تقولي اشتري حبوب التفاؤل ديه منين لاحسن مش لاقيها خالص

وطبعا انا ليا الشرف اني انضم لنادي المكتئبين

بس عايزه اعرف نظام العضويه ايه

بس ان شاء الله خير هانت

Anonymous said...

بوتا
انا اول مره اجى المدونه بس مش عارف حاله الكئابه دى من ايه الله اعلم بس هى على العموم انا لفيت نص البلوجات محدش مبسوط يعنى نقدر نقول حاله عامه
المهم انى الحاله دى بنمر بيها وبندخل فيها لوحدنا وبنطلع منها لوحدنا فنصيحتى ليكى حاولى تطردى الياس والتفرد الى انتى فيه ودورى على اصحابك وعيشى

bota said...

رئيس جمهوريه نفسى

والله فعلا انا حاسه اني البلوج مظلوم
معايا جدا لاني مش باجي هنا غير لما بجد اكون مضايقه اوي اوي جداااااااا
فعلشان كده هتلاقي الكابه دي
وفعلا الناس كلها بقت كده
ربنا يفرحنا كلنا
ومشكور جدا على الزياره

Desert cat said...

عسولة يا بوتا
ومدونة زى العسل زيك
انا قريتها كلها
اخدتها على نفس واحد حتى ما طلعتش دخان

كلنا بتيجى علينا ايام نمر بالحالة دى
ما تقلقيش انتى كدا كويسة اطمنى
امال اختك بقا لما بتقلب معاها كآبة
لو حد كلمها تنطشه مش ترد عليه
الموبايل مقفول 24 ساعه
لو قعدت لوحدها تقعد تعيط من غير سبب
ده انتى كدا فى احسن حالاتك
مرحلة وهتعدى ان شاء الله
تحياتى يا جميل

bota said...

desert cat
متشكره اوي على ذوقك

وكده انا اطمنت على نفسي اني لسه موصلتش لمرحله الخطر

وربنا يفرح قلبك ويبعد عنك الحزن
والحالات الغريبه

ربنا يوفقك

Unknown said...

انت نفسيتك جميلة جدا يا بوتة، وعتابك لنفسك وكسلك خلوني ابتسم، بنتي بتقولي نفسي أدخل دماغ حد واشوفه بيفكر ازاي، الظاهر ان المدونات هتلعب دور الهفريت السحري اللي يخللي الناس تطلع اللي جواها
ربنا يستر
شكراً على زيارتك الجميلة لمدونتي، ويارب تداومي عليها
اشوفك على خير

m_elsewedy said...

يا حول العالم
اه هى هندسة مافيش غيرها
:D

NoOR said...

ههههههههههه هندسه و اعدادي و مصيبه تكون حلوان

يبقي هتشوف ايام سودا يا جميل

معلش عالاحباط بس ده كلام واحد خبره

7 سنين وحياتك


مدونه عسوله ........سلام

NoOR said...

بوتا ده احنا طلعنا زمل بقي كده اوعدك انك هاتقابلي التفاؤل كمان خمس سنين شدي حيلك

هيييييييييييييييييه

كلنا لها

Casper said...

مش عارف ليه دايما لومك لنفسك بيأثر فينا أوى

يمكن عشان بيبقى طالع من القلب

رغم اعتراضى على أسلوب لوم النفس على طول الخط وتفضيلى للتفكير دائما فى الطريق الأفضل للخروج من حالة الاكتئاب

الا أن أسلوبك جاء رائعا

أتمنى أن تكون لحظة وقتية يتبعها التفكير الصحيح للخروج من الحالة دى وكسب الأصدقاء (اللى بيحبوكى) مرة ثانية

وعادى يعنى , ما فيه طلبة فى طب وبيضحكو عادى يعنى

:D

bota said...

يوميات عيل مصري
اهلا بيك اولا
وثانيا والله انا برضه زي بنوتك بالظبط نفسي ادخل دماغ الناس اوي واعرف بيفكروا في ايه وازاي وهما وحشين ولا حلوين وكده
ربنا يخليلك البنوته بافكارها الجامده ديه

سويدي
ههههههههههههههههههه
هي فعلا هلوسه بتعمل كده واكتر
ونورت المدونه

نور
هي فعلا مصيبه اني حلوان
بس تخيل مصيبه اكتر مش اعدادي لا انا
سنه تانيه كمان تخيل لسه عايشه وشكرا على التفاؤل انا متفائله جاهز
بس انت ادعيلي ميكونوش خمس سنين اللي فاضلين دي تبقى مصيبه
وربنا يوفقنا كلنا


كاسبر
بجد بفرح لما بشوف ردك
وبحس اني مقصره معاك معرفش ليه بس مجرد احساس
وانا دلوقتي حالتي النفسيه فوق جداااااااا يعني مفيش لوم نفس ولا اكتئاب ولا الحاجات الوحشه ديه
ربنا يبعدها عنا كلنا

Casper said...

شعور متبادل والله يا بوتا

وانتى مش مقصرة ولا حاجة والله , بالعكس ,ده كفاية سؤالك

ويارب يديمها معرفة عطرة ان شاء الله

وحبيت كمان أباركلك بانتهاء حالة الاكتئاب والحيرة

والله فرحتينا

ويارب نشوفك مبسوطة على طول

Unknown said...

بوتة .. نوريني في التدوينة الجديدة مستني تعليقك

Coca said...

هههههههههههههههههههههههههههههه
حلوه اوي اوي اوي طريقه كتابتك بجد عجبتني جدا عجبتني بضمير يعني
هو احلي حاجه ما يسمونه الجنان والواحد يكلم نفسه
س بجد ياريت تكتبي لان اسلوب لذيذ

bota said...

casper
متشكره على اهتمامك وعلى الدعوات الحلوه ديه

يوميات عيل مصري
بجد دعوتك ليا ديه فرحتني كتير
واعذرني على التاخير بس كان عندي امتحانات

coca
كوكا انتي اكيد بتكلمي على مدونه تانيه
متشكره جدا لذوقك
ونورتيني بزيارتك

Unknown said...

بوتة بنقولك من دلوقتي عشان ما تضربيش الميدتيرم
نورينا تشوفي حاجة ع المدرسة

Hossam said...

hello
really pretty cool thme
hope c u soon
bye

m_elsewedy said...

هههههههههههههههههههههه
يعنى انتى جاية تلومينى عشان مختفى بقالى فترة وانتى اصلا مش بتيجى وعلى اخر بوست من ساعتها
:D
عامة وانتى طيبة يا فندم وبجد حاولى تنزلى بوست قريب ان شاء الله كتاباتك لذيذة والله

NoOR said...

كل سنه وانت طيب يا جميل

safa7_karmooz said...

فينك؟؟؟