الإنسان اصله بالونه

في حاجات لازم... علشان نعرف....درجة قوتها...بنكسرها

وحاجات ف ادينا... عشان نعرف.... اننا عايزينها ....بنخسرها

كدّبت ف عمرك كام صاحب

علشان كان نفسك تتطمن ؟

وخسرت اصحابك واتطمنت

طب كام بالون فرقعوا منك

وإنتا بتنفخهم ع الاخر؟

وعرفت اخرهم بس ندمت

دلوقتي فهمت

أنا عاوز إيه

ونا كنت بفرقع بلالين ليه

أنا عاوز حاجه بدون آخر

أو حتى بآخر ما اوصلّوش

كام حيطه ف ضهري

اضرب واهري

ف بدنهم بس ما يتهدوش

شيء مش مغشوش

مضمون دايما

من غير ما احتاج إني اتأكد

أو حتي اخاف إني اتنكد

لا يكون ف الاخر برضه فاشوش

يا بشر عرفاني وعارفه أنا مين

بلغوا اسفي لكل البلالين

كلنا كنا ف يوم بالونه

فقعتنا تجارب بني أدمين

بلالين عايشين نفسها تلقي

حد يصدق ويقدرها

متأكد من إنه عاوزها

من غير مايجرب يخسرها

- مصطفى ابراهيم-

 حبيتها اوي حسيتها اوي الناس الي يعرفوني كويس ممكن يفتكروا كلمة

Destructive test

اللي انا دايما بقولها اللي هي معناها ببساطه انها اختبار تدميري علشان اعرف اللي قدامي بيستحمل لغاية ايه بس الفكرة

انه من اسمه اختبار تدميري اتلافي يعني بعد ما بعرف قوة التحمل وصفات اللي قدامي بيكون اتفتفت فتافيت نياهاهاها

عمومآ شكرآ لمصطفى انه عرف يوصف اللي في دماغي بالطريقة البديعه ديه

نصيحة عن تجربة لاي حد يقرا النوت لو عندك هواية فرقعه البلالين او الاختبارات الاتلافيه ارجوك حاول تبطلها

لانك الخاسر الاكبر منها

فرجه قريب

مشفقة عليك ايها البلوج العزيز من كتر الهم اللي انت شايله

بس اوعدك قريب جدآ همسح همومك كلها وبالذات المواضيع اللي مش ظهراها لا خصوصآ المواضيع اللي بيني وبينك بس

انا بس حبيت افسحك واخليك تشم هو برا

مصر اليوم في عيد

بلوجي العزيز لازم كنت اجي وافرحك

واقلك ان اراده الشعب انتصرت

اه كان نفسي اكون معاهم من الاول للاخر بس انت اكيد عارف البيت وبابا وماما واخواتي

بس مش مهم عملوها الرجاله وثابروا لغايه ما مبارك تنحى

النهارده حسيت بكلمه ستيته لما قالت فعلا مبارك مش يستاهل انه يطلع منها بطل بعد خطابه الاول لا هو يستاهل انه يتخلع

وبرضه مبرووووووووووووووووووك يا بلدي

يارب قدرنا على تعميرها

ياريته كان زي البشر

حاولت كتير ابعد نفسي النهارده اني اكتب اي حاجه

لان حاسه ان الكتابه شيء قليل اوي عن اللي جوايا

بقالي كتير محسبتش هو غايب عني قد ايه بس النهارده حسبت ولقيتهم تسع سنين

بقالي كتير محسبتش اجازاته كانت قد ايه بس النهارده حسبت ولقيتهم خمس اجازات

بقالي كتير مبكتش البكا ده بس النهارده بكيت لغايه ما حسيت ان قلبي مفطور وعنيا ورمت

بقالي كتير ببعد فكره ان انا محتجاله اوي ومحتاجه لحضنه اوي

النهارده فكرت هو انا ليه بحبه هو ليه غيابه مأثر فيا كده يمكن لقيت سبب بسيط ان هو واخد حته من قلبي محدش عرف يرجعهالي من كل اللي حواليا

الموضوع بسيط جدآ هو حنين عليا بطريقه انا بحبها - اه كل واحد بيكون حنين بطريقته - هو طريقته بتعجبني نظره عنيه و بشاشة وشه ونبرة صوته وكلامه

عمره ما اتجاهل بكايا ابدآ كان بيواجهه وبحس بقلبه بيبكي معايا كان بيقولي بس يا قلب احمد هزعل منك علشان خاطري كفايه بس يا ديدي وحاجات حلوه من هذا القبيل لغاية ما انا بشفق عليه من بكا قلبه

لما اقارنه بغيره الاقي ان غيره لو انا سمحتلهم انهم يشفوني ببكي بحس انهم لو لقو فرصه يهربو ويعملو نفسهم مش واخدين بالهم بيعملو كده ولو حسوا انهم اتدبسوا بسمع كلمه حلوه اوي كفايه انا مش مستحمل (ة) يلا قومي اغسلي وشك -معناها عندي قومي عيطي في حته تانيه - ههههههههه

من الاخر هو لا يقارن

ليه بفكر كل في كل ده دلوقتي

ممكن علشان عندي نقص حاد في الحنان احتمال كبير

يمكن علشان بعلق عليه شماعه فشلي في حاجات تانيه فبقول ان حزني سببه انه وحشني جايز ليه لا

يارب اجمعنا على خير واشفيه من كل مرض وخليه شفاف زي ما هو

اهداء الى بوتا

مستنياكي تصالحيني ببوست جديد يكون فرفوش ونعنوش

فيس بوكي

رجعت حساب الفيس بوك بتاعي

طيب ليه وقفته اصلا ؟ علشان لقتني مدمنه بدخل عليه وقت كتير جدآ ومش بستفيد منه حاجه

وكمان بقيت فضوليه جدآ وانا مش كده مبحبش اتدخل واتفرج على اللي مش يخصني بس الفيس خلاني غير كده وده كان سبب اني اقفله

طيب ليه رجعتيه ؟ لاني اظن اني ادماني قل ولاني بطمن على اصحابي اللي بحبهم منه وعلشان اختبر نفسي

وعليه بوتا اخدت قرار انها لو رجعت مدمنه تاني وفضوليه تاني هتقفله تاني

وحشتني

انت كمان وحشتني

فعلا كان بقالي كتير مسمعتش منك كلمه وحشتيني ووحشتوني كلكم

ربنا يباركلنا فيك

مش بوتا

بوتا عندها وجع في كل حته فيها

بوتا مش قادره تبص في عين حد

بوتا نفسها تفضل ساكته متتكلمش مع اي حد

بوتا صعبان عليها كل اللي حواليها

بوتا كان نفسها تكون هي التغيير اللي يفرحهم

بوتا حتى معملتش التغيير اللي يفرحها هي شخصيا

بوتا مبقتش بوتا ولا دودو ولا ديدي ولا حتى اسمي

كأنها أنا

مجرد احتياج بس المره ديه مش لاي شخص المره ديه لنفسي حاسه انها ضاعت مني وعاوزاها كل حاجه كانت بتحبها دلوقتي بتسببلها ملل وحزن وكل حاجه حاجه كانت مش بتحبها لسه بتسببلها ملل وحزن

يارب رجعها ليا

يارب هي وحشتني اوي

يارب هي بقيت قاسيه عليا اوي

يارب هون

رياح الفقد

رياح الفقد تحاوطني ما بين اخ وحبيب وصديق سمعت عن اصرارها من قبل ولكن عندما رأيتها بعيني تيقنت من انها ستأخذ ما تحب لذلك احاول اغرائها لكي تحبني انا وتأخذني انا وحدي

انا زي ....... لكن عمري ما كنت حقيقه

وصلتني لدرجه اني ادعي دعوه واحده يارب اموت علشان ترتاح مني وتحس قد ايه انت دبحتني وانا عايشه يمكن تحس

حسستني بحاجه واحده اني انا زي ...... لكن مش حقيقه

وخلاص بقى فيه الحقيقه سيب الزي في حاله وانا اوعدك انه هيسيبك في حالك

اقلك على حاجه ربنا مايحوج حد لحد ويخليك واقف دايما على رجليك وبصحتك وعافيتك واسمع عنك دايما انك كويس

والله ما عايزه غير انك مبسوط بس ارجوك سيبني في حالي

انا جيت

انا جيت

معقول جيت هنا تاني بجد مش مصدقة نفسي

اول لما دخلت البلوج عنيا دمعت وحسيت ازاي بقالي حوالي خمس شهور مش فتحته

وزعلت لما لاقيت اغلب المواضيع القديمة محتاجة تنسيق

عموما انا جاية اقوله اني نجحت وطالعة رابعة يعني اخر سنة

وجاية اقوله اني الحمد لله حاسة اني سعيدة اوي وربنا راضي عني فبيكرمني بكل اللي كنت باتمناه واكتر كمان

وعايزه اقوله ان كلها شهر ونص وابقى مبسوطة اكتر واكتر

وعايزه اقوله ان كلها سبع شهور واكون اسعد انسانة في الدنيا

بجد الحمد لله

يلا سلام يا مدونتي العزيزة وغدآ القاكي ان شاء الله

مش عارفة اقول اية فعلا
مش عارفة انا ازاي بكتب الموضوع ده اصلا لاني مش في البيت
وكمان مش في القاهرة
وكمان مش معايا حد من اهلي
ايه ده تصدقوه انا لسه عايشة
طول عمري بقول لو خرجت من بيتنا يوم هموت
اكتشفت اني خرجت ولسه ممتش بالعكس انا عايشة عادي جدآ زي ما اكون في بيتنا بالظبط

يا بوتا اللي بتكره السفر سافرت وعايشة
انا مستغربة نفسي جدآ جدآ

ياه بوتا شكلها كان نفسها تهرب من الدنيا كلها
بوتا مبسوطة انها سافرت ولو حتى الخمس ايام دول
بوتا زعلانه انها مبسوطة انها سافرت
يمكن علشان عارفة انها بتهرب
مش اكتر من هرووووووووووووووب


ملحوظة

اللي هيقرا الموضوع ده مش هيفهم حاجه خالص
لانه مجرد ربع ساعة بريك قلت ادخل اتكلم مع البلوج شوية


امضاء
بوتا وخلاص

new bota

السلام عليكم ورحمة الله وبركاته

وحشتني ايها البلوج المكتئب واسفة على تقصيري معاك بس بجد اول مرة يكون غصب عني

بحيث اصبحت انسانه مشغوله مطحونه

حيث ان الاجازه كانت 14 يوم انا تقريبا مقعدتش يوم في بيتنا

والحمد لله كانت من اجمل الاجازات صحيح بيتخللها بعض الكآبة بس المجمل حلو جدآ الحمد لله

حاسة اني اكتسبت فيها حاجات كتير حلوه

مكنتش متخيلة ابدآ اني ممكن اعرف ناس تاني بس عرفت ناس ومش اي ناس دول ناس علمو فيا

اكتسبت صفات الحمد لله كويسه وعرفت فيها حاجات كتير عن نفسي فيها الحلو وفيها الوحش

بجد الحمدلله انا نصي مبسوط علشان نفسي ونصي زعلان علشان حد تاني

بس انا متاكدة ان ربنا هيقف مع الحد ده

بس بالنصين بقول الحمد لله

بالنصين انا مش مكتآبه وبكرة جاي

ملحوظة مهمه جدآ

كل حد كنت بدخل عنده وبعلق او حتى بقرأ بس بجد وحشني

فاطمة وزي الهوا ونور وشمعه وودكتور كاسبر وسباور

وادم المصري وشيتوس وصبح صبح يا عم الحاج وتلك الايام ومصعب وبراء

ودريني وعابر سبيل وعابرة سبيل وازميرالدا

وطبعا الاتربي اللولبي

وناااااااااااااااااااااااااااااااااااااااااااااااااااس كتير يعرفوني وميعرفونيش

بجد وحشتوني جدآ وربنا يكرم وارجع حتى اقرا بس زي زمان

ملحوظه اهم

مبسوطة جدآ اني عرفت صاحبة مدونة وديوان احيانا واحيانا

اسراء حامد

بجد هي حد محترم جدآ وحساس جدآ

واي حد يتمنى انه يعرفها

واظن اننا قضينا مع بعض انا وهي و27 حد غيرنا 10 ايام متتنسيش

ربنا يجمعنا على خير مع بعض تاني

وربنا يوفق اسراء واشوفلها دواوين كتير :)

امضاء

بوتا المبسوطة

حبيبي وابن حبيبي

اصل محمد ده حبيبي وانا مش بطيق ازعله حتى لو هو اللي غلطان
معرفش ليه بحبه كده
وانا النهارده زعلته بس انا مش قصدي وكمان هو الغلطان يلا يارب ميكنش زعل مني علشان هو حبيبي
انا عارفة انه مش هيقرا الكلام ده وعلشان كده كتبته
على فكره يا محمد بغض النظر على ان بابنا ومامتنا واحدين برضه كنت هحبك يمكن علشان انت اي حد يعرف يحبك
وعايزه اقلك كمان ان انت واخواتك اللي هما اخواتي كنتو احلى واصعب حاجه في 2008
وان شاء الله هتكونو احلى حاجه في 2009 والعمر كله
ربنا يخليكم ليا

-------------------------------------------------------------

ايتها ال 2009
ارجوكي رفقآ بنا

هذيان

السلام عليكم

كل سنة وكلنا طيبين بمناسبة السنه الهجرية والميلاديه وكمان عيد ميلاد صلاح جاهين كل سنه وهو طيب

وكمان كل سنه وكل الطلبة طيبين بمناسبة امتحانات الترم وطبعا لازم نحتفل بالامتحانات كويس ونعمل جدول تمام

ممكن نقول في الجدول ان اليوم 24 ساعه منهم 8ساعات نوم ومنهم حوالي 3ساعات اكل وفوقان من النوم ونيجي على نفسنا ونقول 4 ساعات انترنت ونقول ساعتين بس تليفزيون وساعتين نوم كمان علشان نعرف نركز كويس اه نسيت حاجه مهمه ان المفروض لسه فيه كليه يعني حوالي 7 ساعات

كده نتيجه اليوم

8+3+4+2+2+7=24

كده انا بيس على راي بيبو

وعايزه اقول للبلوج ده على سر رهيب

انا حاسة اني هسقط السنة ديه

ابسط حاجه اي حد هيقولهالي وانا بقلها لنفسي حاسة انك هتسقطي زاكري

فهرد على اي حد وعلى نفسي واقول ما انا هزاكر ان شاء الله بس برضه هسقط ههههههههههه بجد احساس متملكني جدآ

يلا ربنا يعديها على خير

عايزه اقول للبلوج سر تاني

مش عايزه اتكلم مش قادره اتكلم حتى مع نفسي

وياريت ان الناس تفهم ان اللي محتاج مني حاجه ميقوليش عليها لا يكتب الطلب ويبعته وانا هبعهتله الرد مكتوب

ناقص حتة

في هذا الصباح غادرت قطعة من قلبي حدود البلد

ارجو من الله ان يحفظها لي في اي مكان ذهبت اليه الي ان تعود الى قلبي مرة اخرى

احساس غير متوقع

مكسوره وقلبي واجعني

3

4

5