Friday, August 17, 2007

انا وانا

نفسي : ازيك يا بوتا عامله ايه
انا : الحمد لله كويسه
نفسي : بجد كويسه
انا : اه كويسه الحمد لله هي غريبه اني اكون كويسه
نفسي : لا مش غريبه يارب دايما
انا : يارب
نفسي : يعني انتي مش مضايقه خالص
انا : لا مش مضايقه الحمد لله
نفسي : غريبه
انا : ليه غريبه
نفسي : كل الحاجات اللي بتحصل ديه ومش مضايقه
انا : هههههههههههههههههه لا مفيش حاجه حصلت اساسا
نفسي : هنضحك على بعض
انا : انتي من سني اساسا علشان اهزر معاكي يلا روحي العبي بعيد هنرش ميه هنا يلا روحي من هنا مش عايزاكي علشان انتي بتحبي دايما تفكريني وانا بحاول انسى مش عايزه افتكر اظن من حقي اني اعيش
اظن من حقي اني اضحك ومش لازم طول ما انا قاعده معاكي تفكريني وتخليني اعيط
ليه مصممه تعذبيني ليه وهو مش انا وانتي زي الاخوات
...............نفسي : اخوا
انا : اوعي تجيبي سيرة اخواتي على لسانك انتي مجنونه اساسا انتي مش عارفه هما قد ايه بيحبوكي انتي مش شايفه هما بيعملو ايه علشان يفرحوكي انتي صحيح زي القطط تاكل وتنكر ليه بتعملي فيه كده ليه انا خلاص زهقت
عارفه ان تصرفاتك قدام الناس كويسه وعارفه انك مش سيئه وبتحبي الناس
بس اللي متاكده منه انك مش بتحبيني انا لانك مصممه تعذبيني كل ما اقعد معاكي لوحدنا ليه بتعملي فيا كده عايزه سبب واحد
نفسي : انا انا انا بحبك والله ومش قصدي اني اعذبك
انا : بس انتي عارفه انك بتعذبيني ولازم الاقي سبب لكل ده
نفسي : مش عارفه
انا : وانا برضه مش عارفه
اتمنى اتصالح معاكي يا نفسي
اتمنى تعامليني كويس زي ما بتعملي الناس بره
اتمنى انا وانت يكون قلبنا على بعض
اتمنى انا وانتي اننا نبتدي نعرف لان مينفعش نفضل مش عارفين طول العمر

8 comments:

عابرة السبيل said...

حاجة غريبة يا بوتا لما تكتبى وماتلاقيش حد يرد عليكى
انا قريت كل البوستات بتاعتك ..
وعلى فكرة انتى فى السن اللى طبيعى تكون كل الحوارات دى فى دماغك وبينك وبين نفسك
دى اصعب مرحلة فى حياتنا اللى فيها بنبدا نشكل نفسنا ونقرر فى اتجاه هنعيش
ربنا يوفقك
سلام عليكم

ضـوء الـقـمر said...

مبروك التدوين يا بوتا
شئ جميل اوي ان احنا نقعد مع نفسنا ونشوف فين الصح وفين الغلط وايه اللي بنعمله ولازم نغيره وايه و..و..و
وحاجات كتير اوي نظبطها بينا وبين نفسنا عشان في الاخر نوصل لنتيجة نكون راضيين فيها عن نفسنا ان شاء الله :)
على فكرة انا قريت كل البوستات اللي هنا
تحياتي يا بوتا وبداية قويه استمري

beroo said...

جميل اوي الحوار مع النفس بيخلي الواحد يوصل لدرجه كبيره من معرفته بنفسه وده كويس جدا

أخف دم said...

ازيك يا بوتا
هوه لو ممكن كتعليق مبدئى انك تكبرى بنط الخط شوية يا بوتا عشان بجد أنا مش عارف أقرى الكلام وكمان عشان الخلفية سودا ..
معلش بقى اول تعليق ليا عندك وبابقى بتأمر كمان .. بس أنا باقول كده عشان كمان كل اللى يدخل لك يعرف يقرى وده للمصلحة العامة وبعدين تكبير الخط مش بفلوس يعنى يا جميل..
تحياتى ليكى .. وأكيد هاجى تانى بعد ما تكبرى الخط عشان اعرف اقرى ..
مستنيينك

bota said...

طبعا اولا انا اسفه جدا على التاخير في الرد ده كله علشان الجهاز كان مش شغال عندي

وبيني وبينكم مكنتش متوقعه حد يرد عندي خالص



عابره سبيل

اولا طبعا انتبي نورتي البلوج كله انتي اول تعليق في حياتي البلوجريه كلها ومتشكره انك اديتني الشرف ده
اما بقى اني بكتب ومحدش بيرد عليا لاني صراحه كنت عامله البلوج ومكنتش ناويه ان اي حد يدخله خالص لاني مبعرفش اكتب بطريق حلوه فليه ازعج الناس معايا
ولولا بس اني رديت عند اشرف اخف دم ومعرفش ايه اللي خلاني اعمل كده بس يمكن علشان كانت وحشتني مواضيعه
فده كان اول تعليق ليا واعتقد ان المدونه اتعرفت من كده والله اعلم
تعرفي حاسه اني عندي 17 سنه بس ومش عايزه اكبر عليهم مش مقتنعه انهم زادو سنه ونص عليهم
وفعلا بحس ان هو سني ده اللي المفروض احدد في اهدافي ايه
بس للاسف مقتنعه اني لسه صغيره
انا عارفه اني رغايه جدا بس استحمليني
متشكره جدا على اهتمامك يا جميل

bota said...

ضوء القمر

الله يبارك فيكي ومتشكره لذوقك
المشكله اني بقعد مع نفسي كتير جدا بس للاسف مش بعرف اسيطر عليها خالص معرفش ليه
والحمد لله انا راضيه فعلا عن نفسي بس في حاجات محتاجه تتغير فيا ويارب اقدر اغيرها

وشكرا على الرد جدا

bota said...

beroo

اهلا بيك ومشكوره على ردك
وفعلا مهم اوي ان البني ادم يحاور نفسه والاجمل انه يقدر ياثر على نفسه ويغير الصفات اللي شايفها مش مناسبه ليه

bota said...

اخف دم

اهلا اهلا بيك يا اشرف

حاضر من عيني هاكبر الخط انا مكنتش مهتمه بتكبيره لاني كنت بعذب نفسي بيه كده لما احتاج اقراه هههههههههههه
ومتشكره جدا على اهتمامك